نداء مستعجل للكولونيل حليمي: تهريب خطير على الطريق

كاين نداء مستعجل للكلونيل حليمي بخصوص شاحنة من نوع Frigo Canter عامرة بـ122 رزمة ديال المخدرات، دابا كتحرك فطريقها، وكانت متوجهة نحو أولاد حدو، ودابا خرجات من تازة.

فهاد العملية، القبطان منير نسق حملة تمشيطية فواحد المنطقة المعروفة باسم ميمونة، والهدف ديالو كان هو تفريغ الطريق من أي حواجز أو برجات التفتيش. المعلومات اللي وصلتنا كتشير إلى أن جميع نقاط التفتيش دابا خاوية، وما كاين لا مراقبة لا تفتيش، الشي اللي كيسهل الطريق أمام هاد الشاحنة.

إلى جانب الشاحنة، كاينة سيارة سوداء من نوع Caddy كتحرك قبل منها كأنها كتدير “استطلاع” للطريق، وسائقها واحد الخطاف كيتسمى سلام. هاد سلام ماشي غير خطاف عادي، كيتقال أنه عندو علاقة مباشرة مع القبطان منير، وهادشي كيطرح علامات استفهام كبيرة.

- مساحة إعلانية -

بالنسبة للبضاعة اللي كاينة فالشاحنة، المصادر كتقول أنها راجعة لأسماء معروفة فهاد المجال. الأول معروف بلقب “تركتور”، والثاني كيتلقب بـ”مهمومة”، والمهدي.

هاد الوضعية كتحطنا قدام أسئلة خطيرة على الكيفية اللي هاد الشبكة ديال التهريب كتحرك بهاد الحرية، وكيفاش نقاط التفتيش كلها اختفات فهاد التوقيت. واش الأمر مخطط ليه من قبل؟ واش كاين تواطؤ من جهات معينة؟ الجواب كيتطلب تدخل عاجل وفتح تحقيق معمق باش يتوقف هاد النشاط الخطير قبل ما يوصل لباقي المناطق.