الحوز بعد عام ونصف: معاناة بلا نهاية ووعود كاذبة!

من 8 شتنبر 2023 والمغاربة ديال الحوز والمناطق المجاورة عايشين الجحيم. داز عليهم عام ونص، عام ونص ديال المعاناة، ديال الصبر، ديال الويلات. في الأول شفنا السياسيين كيديرو الاستعراضات، كيوزعو الوعود، وكيتسابقو على الكاميرات، ولكن من بعد؟ والو! الناس تخلّاو عليهم، بقاو عايشين وسط البرد والحر والشتا والتلج، بلا حلول حقيقية، بلا سكن لائق، بلا اهتمام.

شتاء 2023 كان صعيب، ولكن الناس صبرو وقالو “غادي يجي الفرج”. جا الصيف، الحرارة القاتلة دازت فوقهم وهم في الخيام، الأرض سخونة، الريح كيرفع الغبرة، والمياه قليلة. وجا شتاء 2024، معاه البرد القارس، التلج لي كيردم كلشي، والخيام لي كطيح وحدة مور وحدة. واليوم، الناس ما زالوا عايشين تحت رحمة الطبيعة، بلا دعم حقيقي.

فين الحكومة؟ فين الأحزاب السياسية؟ فين هادوك لي وعدوهم بالسكن والتعويضات؟ واش كاين شي بلد في العالم كيخلي مواطنيه مشردين لعام ونص بعد كارثة طبيعية؟ السياسيين مشاو على راحتهم، الانتخابات جايا، وعاوتاني غادي يجيبو الوعود الكاذبة، ولكن هاد الناس عاقو وفاقو.

الدولة خاصها تتحمل المسؤولية، وخاص المحاسبة تكون حقيقية. ما يمكنش نبقاو ساكتين قدام هاد الظلم. الحوز وأهله ماشي أرقام ولا صور في التلفزة، راهم ناس كيعانيو كل يوم، كيجاهدو باش يعيشو وسط إهمال دولة فاشلة وسياسيين كذابة.

- مساحة إعلانية -

حتال امتا غادي يبقاو هاد الناس مشردين؟ فين هي الكرامة؟ فين هو الوطن لي خاصو يحمي ولادو؟