واش سمعتي آخر مهازل بلادنا؟ إيوا سمع وتهنّى، حيت لا عقل لا منطق بقى فهاد البلاد! البارح، فالداخلة، مهاجرة إفريقية كتعيش بطريقة غير قانونية فالمغرب، ماعندها لا بطاقة لا أوراق، حاملة، مشات تولد فسبطار الدولة بحالها بحال أي وحدة فحالة ولادة، ولكن هنا المفاجأة…
الدولة تكلفات بيها كثر من اللازم، دارو ليها الفحوصات، قررو يديّوها حتى لمستشفى الجامعي ديال مراكش. وواش مشات بالكاميو ولا بالاسعاف؟ لا لااا… حضرو ليها طيارة خاصة، من نوع Learjet 45، مجهزة بكلشي، باش تولد مرتاحة فمراكش.
واش كتعرفو شحال من مغربية كتموت على باب السبيطار؟ واش نسيتي القصة ديال داك السيدة فإقليم أزيلال؟ هزوها فوق “الميسان”، فوق نعش ديال الموتى، باش يوصلوها تولد. لا طيارة، لا إسعاف، لا سبيطار مجهز… والو!
فين غاديين بهاد السياسة؟ كيفاش مغربية كتمثل هاد البلاد ما تستافدش بحال شي وحدة دخلة بلا ورقة ولا هوية؟ واش المواطن المغربي ماعندوش قيمة؟
الدولة خاصها تفهم أن الأولوية للمواطن، اللي كيخلص الضرائب، اللي كيخدم، اللي كيضحي، ماشي لأي واحد دخل بطريقة غير شرعية وبغا يتهنى على ظهرنا.
ماشي عنصرية، ولكن عدالة. حنا ماشي ضد المساعدة، ولكن كاينين مغربيات كيتعذبوا باش يلقاو طبيب، كيتسناو الساعات فالممرات، وها أنتوما كتشوفو، الأجنبي كيتحط فوق طيارة خاصة وكيتدوا لمراكش بحال فالأفلام!
راه هادي ماشي بلاد، هادي مهزلة.
